တန်ဖိုးဖြတ်မရတဲ့

ငါ့သရောက်မြို့နယ်အတွင်း အကြမ်းဖက်အုပ်စုနှင့် ဖြစ်ပွားခဲ့သည့် ထိတွေ့တိုက်ပွဲများအတွင်း တပ်စိတ်မှူးအပါအဝင် တော်လှန်ရေးတပ်ဖွဲ့ဝင် ၁၁ ဦးကျဆုံးခဲ့

ဇူလိုင်လ ၁၂ ရက်

မန္တလေးတိုင်း၊ ညောင်ဦးခရိုင်၊ ငါ့သရောက်မြို့နယ်အတွင်း ဖြစ်ပွားခဲ့တဲ့တိုက်ပွဲတွေမှာ တော်လှန်ရေးတပ်တွေဘက်က တပ်စိတ်မှူးအပါဝင် တပ်ဖွဲ့ဝင် ၁၁ ယောက် ကျဆုံးခဲ့တယ်လို့ ညောင်ဦးမြို့နယ်​ ပြည်သူ့ကာကွယ်ရေးတပ်ဖွဲ့ တာဝန်ရှိသူ ကိုဇီးက မောင်းသတင်းဌာနကို ပြောပါတယ်။

ပြီးခဲ့တဲ့ ဇွန်လ ၃၀ ရက်ကနေ ဇူလိုင်လ ၂ ရက်အထိ ငါ့သရောက်မြို့နယ်အတွင်း ဖြစ်ပွားခဲ့တဲ့ ထိတွေ့တိုက်ပွဲတွေမှာ အကြမ်းဖက်စစ်အုပ်စုက ထိခိုက်သေဆုံးမှုတွေ ရှိခဲ့သလို တော်လှန်ရေးတပ်တွေဘက်ကလည်း ကျဆုံးမှုတွေ ရှိခဲ့တာဖြစ်ပါတယ်။

အဲ့ဒီတိုက်ပွဲတွေမှာ ပုဂံပြည်ဘီလူးတပ် ခေါ် ညောင်ဦးမြို့နယ်ပြည်သူ့ကာကွယ်ရေးတပ်ဖွဲ့က တပ်စိတ်မှူးနဲ့ ဒုတပ်စိတ်မှူးအပါအဝင် တပ်ဖွဲ့ဝင် ၅ ယောက် ကျဆုံးခဲ့ပြီး ကျန်တပ်ဖွဲ့တွေနဲ့ဆိုရင် တော်လှန်ရေးတပ်ဖွဲ့ဝင် စုစုပေါင်း ၁၁ ယောက် ကျဆုံးခဲ့တယ်လို့ သိရပါတယ်။

“ရဲဘော်တွေ အကုန်လုံးကအားကိုးရတယ်။ အထူးသဖြင့် တပ်စိတ်မှူး ရဲဘော် ဒီပ နဲ့ ဒုတပ်စိတ်မှူး Joker တို့ ဆိုရင်တိုက်ပွဲ အတွေ့အကြုံတွေ အများကြီး ရှိတယ်။ စစ်ကိုင်းတိုင်းဘက်မှာကတည်းက အတူတူတိုက်လာတဲ့ ရဲဘော်တွေပါ။ ရဲဘော် ဒီပ ဆို တောင့်ခံထားတာ ဆေးရုံရောက်ပြီး ၂ ရက်လောက်နေမှ ကျတာပါ။ ရဲဘော်တွေရဲ့ရဲစွမ်းသတ္တိကို အစဉ်သတိရပြီး နွေဦးတော်လှန်ရေးပြီးတဲ့အထိ အဆုံးသတ်တိုက်ပွဲဝင်သွားမှာပါ “လို့ ညောင်ဦးမြို့နယ်​ ပြည်သူ့ကာကွယ်ရေးတပ်ဖွဲ့ တာဝန်ရှိသူ ကိုဇီးက မောင်းသတင်းဌာနကို ပြောပါတယ်။

အကြမ်းဖက်စစ်ကြောင်းမှာ နေပြည်တော် အထူးကွန်မန်ဒိုရဲ့ စစ်ကြောင်းနဲ့ နယ်မြေခံပြည်သူ့စစ်တွေ ပါဝင်ပြီး ငါ့သရောက်ရဲစခန်းကနေ အင်အား ၁၀၀ နီးပါးနဲ့စစ်ကြောင်း ၂ ခု ခွဲထွက်လာခဲ့တာလို့ သိရပါတယ်။

ဇူလိုင်လ ၂ ရက်က စစ်အုပ်စုတွေ တောင်တောကျေးရွာကို မီးရှို့ဖျက်ဆီးနေချိန် တော်လှန်ရေးတပ်ဖွဲ့တွေက သွားရောက်တိုက်ခိုက်ရာမှာ ကင်းပုန်းစောင့်နေတဲ့ ကွန်မန်ဒိုကင်းပုန်းနဲ့ ထိတွေ့တိုက်ပွဲဖြစ်ပွားခဲ့ပြီး တိုက်ပွဲအတွင်း နှစ်ဖက်ထိခိုက်သေဆုံးမှုတွေ ရှိခဲ့တာဖြစ်တယ်လို့ Popa Production & Guerilla Force-PPGF က ထုတ်ပြန်ပါတယ်။

” တောင်တောနဲ့ ဖလန်ကန်ကြားမှာဖြစ်တာ။ ကျွန်တော်တို့ဘက်က ကာကင်းလောက်တင်ဆိုတော့ အင်အားက ၃၀ ဝန်းကျင်လောက်ပဲ ပါတာ။ စကစက တောင်တောကနေ ဖလန်အကူး နောက်ဆုံးတပ်စိတ်ပေါ့။ အင်အားက ၂ ဆလောက်ကွာသလို သူတို့က နေရာကောင်းရသွားတဲ့အတွက်ကြောင့် ပွဲချိန်သိပ်မကြာလိုက်ပဲ ရဲဘော်တွေပေးလိုက်ရတာပါ။ ကျဆုံးခဲ့တဲ့ ရဲဘော်တွေကို အမိန့်ပြန်သင်္ဂြိလ်ပြီးပါပြီ။ သီးသန့် ကျဆုံးရဲဘော်တွေအတွက် ဂုဏ်ပြုထုတ်ပြန်သွားဦးမှာပါ။” လို့ တိုက်ပွဲအတွင်း တပ်ဖွဲ့ဝင် ၃ ယောက်ကျဆုံးခဲ့တဲ့ Popa Production & Guerilla Force-PPGF တပ်ဖွဲ့ တာဝန်ရှိသူက မောင်းသတင်းဌာနကို ပြောပါတယ်။

အဆိုပါတိုက်ပွဲတွေနဲ့ ပက်သက်ပြီးညောင်ဦးမြို့နယ် ပြည်သူ့ကာကွယ်ရေးတပ်ဖွဲ့တာဝန်ရှိသူ ကိုဇီးက ” အဓိက ရန်သူ ဘက်က လက်နက်ကြီး ပစ်အားနဲ့ ဒရုန်းတွေသာတယ်။ ကျွန်တော် တို့က စိတ်ဓတ် ရှိလို့သာ တိုက်နေတာ။ လက်နက်၊ ကျည်မပေါဘူးး။ ဖလန်ကန် တိုက်ပွဲ မှာ ဆို စကစ ဘက်က. လက်နက်ကြီး တအား သုံး တယ်။၆၀ မမ တွေ ဆို အလုံးရေ မနည်းဘူး။ ပြီးရင် ဒရုန်း နဲ့ ဗုံးတွေ ဆက်တိုက်ချတယ်။ ကျနော်တို့မှာ ထိခိုက် ဒဏ်ရာ ရရင်တောင် ကိုယ့်ဘာသာ အဆင်ပြေသလို အရင် ကုနေရတာပါ။ ဆရာဝန်မရှိပါဘူး။ ဒီကြားထဲ တပ်ဖွဲ့နာမည်ခံပြီး လိမ်လည်အလှူခံတာတွေ ရှိနေပါတယ်” လို့ မောင်းသတင်းဌာနကို ပြောပါတယ်။

အကြမ်းဖက်စစ်ကောင်စီတပ်တွေဟာ ညောင်ဦးမြို့နယ်အတွင်း ချောင်းရှည်၊ ပွဲတန်း၊ ဇီစပြင်၊ ကျောက်ပြင်ကန်နဲ့ မြောင်စတဲ့ ကျေးရွာတွေကို ဆက်တိုက်မီးရှို့ခဲ့တဲ့အတွက် ကျေးရွာပေါင်း ၂၀ ကျော်က ဒေသခံတွေဟာ ဘေးလွတ်ရာတိမ်းရှောင်နေရတယ်လို့ သိရပါတယ်။

ပုံစာ – ငါ့သရောက်မြို့နယ်တိုက်ပွဲအတွင်း ကျဆုံးခဲ့သည့် ပုဂံပြည်ဘီလူးတပ်မှ တပ်ဖွဲ့ဝင်များ…
#မောင်း
#HlaingInfo