ရုတ်တရက်ကြီး မထင်ရဘူး

ဒေါ်အောင်ဆန်းစုကြည် နှလုံးရောဂါ ဆိုးရွားစွာခံစားနေရပြီး နှလုံးရောဂါ အထူးကုဆရာဝန်ဖြင့် ပြသရန် တောင်းဆိုသော်လည်း စစ်တပ်က ငြင်းဆန်

ရန်ကုန်၊ စက်တင်ဘာ ၅

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်သည် နှလုံးရောဂါ ဆိုးရွားစွာခံစားနေရပြီး နှလုံးရောဂါ အထူးကုဆရာဝန်ဖြင့် ပြသရန် တောင်း ဆိုသော်လည်း စစ်တပ်က ငြင်းဆန်ထားကြောင်း ဗြိတိန်အခြေ စိုက် The Independent သတင်းဌာနက သတင်းဖော်ပြသည်။

အသက် ၈၀ နှစ်ရှိနေပြီဖြစ်သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်မှာ နှလုံးရောဂါ ဆိုးရွားစွာ ခံစားနေရကြောင်း၊ နှလုံးရောဂါအထူးကုဆရာဝန်နှင့် ပြသရန် တောင်းဆိုသော်လည်း စစ်တပ်က ငြင်းပယ်ထားကြောင်း သိရှိရသည်။

အကြမ်းဖက်စစ်တပ်အနေဖြင့် ဒေါ်အောင်ဆန်းစုကြည်ကို သူမ၏ နိုင်ငံရေး အခန်းကဏ္ဍ ရည်ရွယ်ချက်ရှိရှိ အဆုံးသတ်စေရန် လုပ်ဆောင်ထားပြီး နေပြည် တော်ရှိ တောတွင်း အကျဉ်းထောင်တွင် ချုပ်နှောင်ထားသည်ဟု The Independent က ဆိုသည်။

မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်၏ သားဖြစ်သူKim Aris က သူမ၏ ကျန်းမာရေး ယိုယွင်းလာမှုနှင့် ပတ် သက်၍ သတိပေးပြောဆိုထားပြီး ဒေါ်အောင်ဆန်းစုကြည်အတွက် အရေးပေါ် ဆေးကုသမှု ခံယူခွင့်ကို စစ်တပ်က ခွင့်ပြုပေးရန်နှင့် နိုင်ငံတကာ အသိုင်းအဝိုင်းက ဝင်ရောက် စွက်ဖက်ရန် တောင်းဆိုထားသည်။

၂၀၂၁ ခုနှစ် ဖေဖော်ဝါရီလ စစ်တပ်အာဏာသိမ်းပြီးကတည်းက အကျဉ်းချခံထားရသော အသက် ၈၀ နှစ်အရွယ် ဒေါ်အောင်ဆန်းစုကြည်သည် ပိုမိုဆိုးလာသော နှလုံးရောဂါကို ခံစားနေရကြောင်း သားဖြစ်သူ Kim Aris က The Independent သို့ ပြောကြားသည်။

“အမေရဲ့ ကျန်းမာရေး ပိုဆိုးလာတာကို ကြားရတာ အရမ်းစိတ်မကောင်း ဖြစ်မိပါတယ်။ သူမမှာ နှလုံးရောဂါရှိနေတယ်။ အကျဉ်း ထောင် ပြင်ပ ပုဂ္ဂလိက နှလုံးအထူးကုဆရာဝန်ဆီမှာ ပြသဖို့ တောင်းဆိုပေမယ့် ဒါကိုခွင့်ပြုပေးလားဆိုတာ မသိရသေးဘူး “ဟု Kim Aris က ပြောဆိုထားသည်။

စစ်တပ် အာဏာသိမ်းမှု ၄ နှစ်ပြည့်သည့် ယခုနှစ်ဖေဖော်ဝါရီလတွင် ဗြိတိန်နိုင်ငံခြားရေးဝန်ကြီး ဒေးဗစ်လမ်မီက “ဒေါ်အောင်ဆန်းစုကြည်ကို လွှတ်ပေးပါ။ ဖိနှိပ်အနိုင်ကျင့်မှုများစွာနဲ့ ဖမ်းဆီးထားသူတွေအားလုံးကို ပြန်လွှတ်ပေးပါ။ မြန်မာပြည်သူတွေနဲ့ ထိုက်တန်တဲ့ ငြိမ်းချမ်းရေးနဲ့ ဒီမိုကရေစီကို ပေးပါ” ဟု တောင်းဆိုထားသည်။

ဗြိတိန် နိုင်ငံခြားရေးဝန်ကြီး ပြောဆိုသည့် အတိုင်းပင် စစ်တပ်က ဒေါ်အောင်ဆန်းစုကြည်ကို ပြောင်ပြောင်တင်းတင်း စွဲချက်တင်ကာ အကျဉ်းချခြင်းမှာ ရိုင်းစိုင်းမှုနှင့် ထင်ရှားသော မတရားမှုပင်ဖြစ်ကြောင်း The Independent က ရေးသားထားသည်။