Uncategorized

ပျှော်လိုက်တော့ ကိုထွန်း တီးချက်အားရစရာကြီး

ဘူးသီးတောင် စကခ (၁၅)အပါအဝင်တပ်ရင်း(၄) ရင်းနှင့် မောင်တောမြို့နယ်က ကျီးကန်းပြင်ဌာနချုပ်အပါအဝင် စခန်းကြီး ၄ ခုကို အပြီးသတ်သိမ်းပိုက်
(စစ်လက်နက်ပစ္စည်းများနှင့် သုံ့ပန်းများ ဖမ်းဆီးသိမ်းဆည်းရမိ)
(AA ထုတ်ပြန်ချက်အပြည့်အစုံ ဖတ်ရှုပါ)

နိရဉ္စရာ၊ မေ ၅/ ၂၀၂၄

ရခိုင်ပြည် ဘူးသီးတောင် အခြေစိုက် တပ်မဌာနချုပ်စကခ (၁၅)အပါအဝင်တပ်ရင်း(၄) ရင်းနှင့် မောင်တောမြို့နယ်က ကျီးကန်းပြင်ဌာနချုပ်အပါအဝင် စခန်းကြီး ၄ ခုကို အပြီးသတ် သိမ်းပိုက်ရယူထားပြီဖြစ်ကြောင်း အာရက္ခတပ်တော် (AA)က မေ ၄ ရက် နေ့စွဲနဲ့ သတင်း ထုတ်ပြန်သည်။

ဘူးသီးတောင်မြို့မှ သိမ်းပိုက်ရယူထားသော စခန်းများမှာ ဘူးသီးတောင် အခြေစိုက် စကခ (၁၅) တပ်မဌာနချုပ်၊ ခမရ (၅၅၂)၊ ခမရ (၅၆၄) ၊ ခမရ(၅၆၅)နှင့် ခမရ (၅၅၁) တို့ဖြစ်ကြသည်။

ရခိုင်ပြည် အနောက်ဘက်နယ်စပ် မောင်တောမြို့နယ်မှ သိမ်းပိုက် ရရှိထားသည့် စခန်းများမှာ တာဝါတိုင် စခန်းကုန်း၊ (၆) မိုင်စခန်းကုန်း၊ နခခ-၁ (ကျီးကန်းပြင်) နခခ-၁၀ (လှဖိုးခေါင်) စခန်းတို့ ဖြစ်ကြသည်။

ရန်သူ့စစ်ကောင်ဆီက လက်နက်ခဲယမ်း၊ စစ်အသုံးအဆောင်ပစ္စည်းတွေနဲ့ လက်နက်ချ အညံ့ခံတဲ့ သုံ့ပန်းတွေကို ဖမ်းဆီး ရမိထားတယ်လို့လည်း ဆိုပါတယ်။

ခမရ (၅၅၁) နှင့် စကခ (၁၅) တပ်မဌာနချုပ်ကနေ ထွက်ပြေးနေကြတဲ့ ရန်သူတွေကို လိုက်လံရှင်းလင်း တိုက်ခိုက်လျက်ရှိနေတဲ့ အတွက် တိုက်ပွဲဟာ ဆက်လက်ပြင်းထန်နေတယ်လို့ ထုတ်ပြန်ချက်မှာ ဖော်ပြပါတယ်။

အလား အတူ စခန်းစွန့်ခွာ ထွက်ပြေးလွတ်မြောက်နေတဲ့ ရန်သူတွေဟာ ဘူးသီးတောင်မြို့နယ်၊ တန်းရှောက်ခံရွာအတွင်းကနေ ခုခံကာကွယ်မှုတွေရှိခဲ့ပေမယ့် အာရက္ခတပ်တော်က ချေမှုန်းတိုက်ခိုက်နိုင်ခဲ့အတွက် ရန်သူ့ဖက်က ထိခိုက်၊ သေဆုံးမှုများ များပြားခဲ့တယ်လို့ဆိုပါတယ်။

အာရက္ခတပ်တော်က ထုတ်ပြန်ချက် အပြည့်အစုံကို အောက်ပါမှာ ဖတ်ရှုနိုင်ပါတယ်>>>

—-

ရက္ခိုင်ဒေသ အတွင်း တိုက်ပွဲသတင်းများ

၂၀၂၄ ခုနှစ်၊ မေလ (၄) ရက် ရက္ခိုင်ဒေသအတွင်း၌ ဖက်ဆစ် အကြမ်းဖက် စစ်ကောင်စီ နှင့် အာရက္ခတပ်တော် ( Arakan Army) တို့သည် ၂၀၂၃ ခုနှစ်၊ နိုဝင်ဘာလ (၁၃) ရက်မှ တကျော့ပြန်တိုက်ပွဲများ ပြန်လည်ဖြစ်ပွားခဲ့ပြီး တိုက်ပွဲကာလသည် ခြောက်လနီးပါးခန့်အထိ ကြာမြင့်လာခဲ့ပြီဖြစ်သည်။

မိမိတို့အနေဖြင့်လည်း ထိုးစစ်အား တစ်ရက်မှ ရပ်တန့်ခြင်း မရှိဘဲ အကြမ်းဖက် စစ်ကောင်စီ၏ လက်နက်ချအညံ့မခံသေးသော တပ်ရင်း၊ တပ်မ၊ စကခဌာနချုပ်၊ နပခ ဌာနချုပ်များကို ယနေ့အချိန်အထိ ဆက်လက် ထိုးစစ်ဆင် တိုက်ခိုက်လျက်ရှိသည်။

ဖက်ဆစ် အကြမ်းဖက် စစ်ကောင်စီ၏ စစ်ဆင်ရေးကွပ်ကဲမှုဌာနချုပ် (စကခ) များဖြစ်ကြသော စကခ (၅) တောင်ကုတ်၊ စကခ (၉) ကျောက်တော်နှင့် စကခ (၁၅) ဘူးသီးတောင်တို့သည် ရက္ခိုင်ဒေသအတွင်း၌ ရှိကြသည်။

အဆိုပါ စကခ သုံးခုထဲမှ တစ်ခုဖြစ်သော စကခ (၉) ကျောက်တော် လက်အောက်ခံတပ်ရင်းများ အားလုံးကို အာရက္ခ တပ်တော် မှ ၂၀၂၄ ခုနှစ်၊ ဖေဖော်ဝါရီလ (၁၁) ရက်နေ့၌ တစ်ခုမကျန် အပြီးသတ် သိမ်းပိုက် ရယူထားပြီး ဖြစ်သည်။

ထို့အတူ လက်ကျန် စကခ နှစ်ခုထဲမှတစ်ခုဖြစ်သော “စကခ (၁၅) ဘူးသီးတောင်”လက်အောက်ရှိ တပ်ရင်းများ ဖြစ်ကြသော ခမရ (၃၄၅)၊ ခမရ (၃၅၂)၊ ခမရ (၃၅၃)၊ ခမရ (၅၃၅)၊ ခမရ (၅၅၁)၊ ခမရ (၅၅၂)၊ ခမရ (၅၆၄)၊ ခမရ (၅၆၅) တပ်ရင်းများနှင့ “ဘူးသီးတောင်ဗျူဟာ”လက်အောက်ခံ တပ်ရင်းများ ဖြစ်ကြသော ခလရ (၂၃၃)၊ ခလရ (၂၃၄)၊ ခလရ (၂၆၃) နှင့် အမတ (၃၇၈) တို့ကို အာရက္ခတပ်တော် မှ တစ်ခုပြီး တစ်ခု ထိုးစစ်ဆင် တိုက်ခိုက်လျက်ရှိပြီး လက်ရှိအချိန်တွင် ခမရ (၅၅၂)၊ ခမရ (၅၆၄) ၊ ခမရ(၅၆၅)၊ ခမရ (၅၅၁) နှင့် စကခ (၁၅) ဘူးသီးတောင် တပ်မဌာနချုပ် စခန်းတို့အား မိမိတို့မှ အပြီးသတ် သိမ်းပိုက် ရယူထားပြီး ဖြစ်သည်။

ထို့အတူ မိမိတို့သိမ်းပိုက်ရယူရန်ကျန်ရှိနေသေးသော လက်ကျန်စခန်းများကိုလည်း တစ်ပြိုင်နက်တည်း ထိုးစစ် ဆင်တိုက်ခိုက်လျက်ရှိသည်။

(၁) ခမရ (၅၅၂) တပ်ရင်းအား ၂၀၂၄ ခုနှစ်၊ မတ်လ (၂၅) ရက်နေ့တွင်လည်းကောင်း၊ (၂) ခမရ (၅၆၄) တပ်ရင်းအား ဧပြီလ (၅) ရက်နေ့တွင်လည်းကောင်း၊ (၃) ခမရ (၅၆၅) တပ်ရင်းအား ဧပြီလ (၂၄) ရက်နေ့တွင်လည်းကောင်း၊ (၄) စကခ (၁၅) ဘူးသီးတောင် တပ်မဌာနချုပ်အား မေလ (၂) ရက်နေ့တွင်လည်းကောင်း၊ (၅) ခမရ (၅၅၁) တပ်ရင်းအား မေလ (၃) ရက်နေ့တွင်လည်းကောင်း အသီးသီးသိမ်းပိုက် ရရှိထားပြီး ဖြစ်သည်။

ရန်သူ၏ လက်နက်ခဲယမ်း၊ စစ်အသုံးအဆောင်ပစ္စည်းများ နှင့် လက်နက်ချ အညံ့ခံသော သုံ့ပန်းများ ကို ဖမ်းဆီး ရမိထားသည်။

စကခ (၁၅) တပ်မဌာနချုပ် အား အာရက္ခတပ်တော်မှ ကာလအတန်ကြာ ဝိုင်းရံပိတ်ဆို့ထားခဲ့ပြီး ၂၀၂၄ ခုနှစ်၊ ဧပြီလ နောက်ဆုံးအပတ်မှ ထိုးစစ်အားအရှိန်မြှင့်ခဲ့ကာ (၁၂) ရက်ကြာ အပြင်းအထန် ထိုးစစ်ဆင်တိုက်ခိုက်ခဲ့ပြီးမှ ယခုကဲ့သို့ သိမ်းပိုက်ရယူနိုင်ခဲ့ခြင်းဖြစ်သည်။

ခမရ (၅၅၁) နှင့် စကခ (၁၅) တပ်မဌာနချုပ်မှ ထွက်ပြေးနေသော ရန်သူများအား လိုက်လံရှင်းလင်း တိုက်ခိုက်လျက်ရှိသောကြောင့် တိုက်ပွဲများ ဆက်လက်ပြင်းထန်နေခဲ့သည်။ ထို့အတူ စခန်းစွန့်ခွာ ထွက်ပြေးလွတ်မြောက်နေသော ရန်သူများသည် ဘူးသီးတောင်မြို့နယ်၊ တန်းရှောက်ခံရွာအတွင်းမှ ခုခံကာကွယ်မှုများရှိခဲ့သော်လည်း မိမိတို့မှ ချေမှုန်းတိုက်ခိုက်နိုင်ခဲ့၍ ရန်သူ့ဖက်မှ ထိခိုက်၊ သေဆုံးမှုများ များပြားခဲ့သည်။

ဤထိုးစစ်များနှင့် စခန်းသိမ်းတိုက်ပွဲများအတွင်း အသက်၊ ကိုယ်လက်အင်္ဂါများကို ပေးဆပ်စွန့်လွှတ် ခဲ့ရသော အာရက္ခ စစ်သည်တော်များအား လေးနက်စွာ မှတ်တမ်းတင်ရှိသည့်အပြင် ထိုးစစ်တိုက်ပွဲများ အတွင်း သတ္တိပြောင်မြောက်စွာ တိုက်ပွဲဝင်ခဲ့ကြသော အာရက္ခစစ်သည်တော်များ၊ ကြီးကြပ်ကွပ်ကဲ နိုင်ကြသော အဆင့်ဆင့်သော အာရက္ခစစ်သည်တော်များကို လေးနက်စွာ မှတ်တမ်းတင် ဂုဏ်ပြုအပ်ပါသည်။

ထို့အတူ မောင်တော၊ အမ်း၊ ကျောက်ဖြူ၊ သံတွဲ မြို့များ၌လည်း စစ်ကောင်စီနှင့် အာရက္ခ တပ်တော်တို့သည် တိုက်ပွဲများ ဆက်လက်ရှိနေခဲ့သည်။

ဘူးသီးတောင်-မောင်တော ကားလမ်းတစ်လျှောက် ရန်သူ့စခန်းများဖြစ်ကြသော တာဝါတိုင် စခန်းကုန်း၊ (၆) မိုင်စခန်းကုန်း တို့အပြင် နခခ-၁ (ကျီးကန်းပြင်) နခခ-၁၀ (လှဖိုးခေါင်) စခန်းကိုလည်း သိမ်းပိုက်ရရှိခဲ့သည်။

အမ်းမြို့နယ်အတွင်းရှိ တောဟိန်းတောင်ဗျူဟာ အား ဆက်လက်ထိုးစစ်ဆင်တိုက်ခိုက်လျက်ရှိသည်။ (ဓာတ်ပုံ- ပုံဟောင်းများသာ)

(သတင်းနှင့်ပြန်ကြားရေး အာရက္ခတပ်တော်)

Leave a Reply

Your email address will not be published. Required fields are marked *