Uncategorized

ဆင်ဘိုမြို့ ဆိုးအောက်ပြီ

ဆင်ဘိုမြို့ရှိ ခလရ(၁၄၁)တပ်ရင်းဌာနချုပ်ကို KIA ယနေ့ ညနေတွင် အပြီးသတ်သိမ်းပိုက်

“လွင်ပြင်မှာ ထီးထီးဖြစ်နေတဲ့ တောင်ကုန်းမှာ အခြေစိုက်ထားတော့ ဗျူဟာအခင်းအကျင်းတွေ ပြောင်းပြီးတိုက်မှ အခုပြန်ရတာ” – စစ်ရေးသတင်းရင်းမြစ်

ဟန်နွေ/People’s Spring

ကချင်ပြည်နယ် မြစ်ကြီးနားမြို့နယ် ဆင်ဘိုမြို့အနီးရှိ စစ်ကောင်စီတပ်ရင်း ခလရ(၁၄၁)ကို ယနေ့ ညနေပိုင်းတွင် သိမ်းပိုက်နိုင်ပြီဖြစ်ကြောင်း ကချင်စစ်ရေးသတင်းရင်းမြစ်က ပြောသည်။

KIA ပူးပေါင်းတပ်များသည် ဖေဖော်ဝါရီ ၁၀ ရက်တွင် ဆင်ဘိုမြို့ကိုသိမ်းပိုက်ပြီးနောက် မြို့အနီးရှိ စစ်ကောင်စီတပ်ရင်း ခလရ(၁၄၁)ကို ထိုစဉ်ကတည်းက တိုက်ခိုက်ခဲ့ခြင်းဖြစ်သည်။

သို့ရာတွင် သိမ်းပိုက်နိုင်ခြင်းမရှိ၍ မတ်လ နှင့် ဧပြီတို့တွင် ဆက်လက်ထိုးစစ်ဆင်ခဲ့ရာ ဧပြီ ၂၈ရက် ညနေ ၆နာရီခွဲတွင် အပြီးသတ် သိမ်းနိုင်ခဲ့ခြင်းဖြစ်သည်ဟု ဆိုသည်။

“ရန်သူ မထွက်ပြေးဘူး။ မိမိဘက်မှ တိုက်ခိုက်ချေမှုန်းတာ”ဟု ဆင်ဘို ခလရ(၁၄၁) တပ်ရင်း သိမ်းပိုက်နိုင်မှု အပေါ် စစ်ရေးသတင်းရင်းမြစ်က ပြောပြသည်။

အဆိုပါ တပ်ရင်းသိမ်းပိုက်ရန် KIAက ဧပြီ ၂၆ရက်တွင် ပြန်လည်ထိုးစစ်ဆင်ရာ ကာကင်း ၁ခုကို သိမ်းနိုင်ခဲ့ပြီး ၂၇ရက်တွင် နောက်ထပ် ကာကင်း တစ်ခုသိမ်းပိုက်နိုင်ခဲ့သည်။

ယနေ့ ညနေပိုင်းတွင် တပ်ရင်းဌာနချုပ်အား လေကြောင်း ပစ်ကူပေးနေသည့်ကြားမှာ သိမ်းပိုက်ခဲ့ရာ လက်ရှိတွင် ရှင်းလင်းနေဆဲဖြစ်သည်ဟုဆိုသည်။

“ခလရ (၁၄၁)က လွင်ပြင်မှာ ထီးထီးဖြစ်နေတဲ့ တောင်ကုန်းမှာ အခြေစိုက်ထားတော့ ဗျူဟာ အခင်းအကျင်းတွေ ပြောင်းပြီး တိုက်မှ အခုပြန်ရတာ”ဟု စစ်ရေးသတင်းရင်းမြစ်က ပြောပြသည်။

ဆင်ဘို ခလရ(၁၄၁)တပ်ရင်း သိမ်းပိုက်မှု၊ စစ်ကောင်စီတပ်သားများ သေဆုံးထိခိုက်နှင့် အရှင်ဖမ်းဆီးရရှိမှု ရှိမရှိ အခြေအနေများ၊ လက်နက်ခဲယမ်း သိမ်းပိုက်ရရှိမှု အခြေအနေများကို ဆက်လက်စုံစမ်းနေဆဲဖြစ်သည်။

KIA အနေဖြင့် ယခုနှစ်အတွင်း ဖားကန့်၊ မြစ်ကြီးနား၊ မံစီ၊ တနိုင်း၊ ဝိုင်းမော်၊ မိုးမောက်၊ လိုင်ဇာအနီးဒေသများ၊ ဆွမ်ပရာဘွမ်၊ ဗန်းမော်-လွယ်ဂျယ်လမ်း ၊ ဗန်းမော်-မြစ်ကြီးနားလမ်း တို့မှ စစ်ကောင်စီတပ်စခန်းအများအပြားကိုသိမ်းပိုက်ရရှိထားသည်။

(ကချင်လွတ်လပ်ရေးတပ်မတော်(KIA)မှ ရဲဘော်များ ရှေ့တန်းတနေရာ၌ တွေ့ရစဉ်။ ဓာတ်ပုံ – KIA)

Leave a Reply

Your email address will not be published. Required fields are marked *