Uncategorized

စခန်းကို AA က သိမ်းပိုက်

မောင်တော၊ အလယ်သံကျော်နယ်ခြားစောင့်ရဲတပ်ဖွဲ့စခန်းကို AA က သိမ်းပိုက်ရရှိထားပြီး နယ်ခြားစောင့်ရဲတပ်ဖွဲ့ဝင်နှင့်မိသားစု ၄၀၀ နီးပါး AA လက်ထဲတွင် စစ်သုံ့ပန်းအဖြစ် ဖမ်းဆီးခံထားရ

ဇွန် ၁၄

ရခိုင်ပြည်၊ မောင်တောမြို့နယ်ရှိ အလယ်သံကျော်နယ်ခြားစောင့်ရဲတပ်ဖွဲ့စခန်းကို AA က သိမ်းပိုက်သွားပြီး နယ်ခြားစောင့်ရဲတပ်ဖွဲ့ဝင်နှင့် မိသားစု ၄၀၀ နီးပါး AA ၏ လက်ထဲတွင် ဖမ်းဆီးခံထားရကြောင်း ပြည်ထဲရေးဝန်ကြီးဌာန၊ မြန်မာနိုင်ငံရဲတပ်ဖွဲ့ သတင်းရင်းမြစ်က ရန်ကုန်ခေတ်သစ်သတင်း ဌာနထံသို့ ပြောဆိုသည်။

မောင်တောမြို့နယ်ရှိ အလယ်သံကျော်နယ်ခြားစောင့်ရဲတပ်ဖွဲ့စခန်းကို AA က ဇွန်လ ၉ ရက်နေ့ ဝန်းကျင်မှစတင်၍ တိုက်ခိုက်မှုများရှိနေကြောင်း အဆိုပါစခန်းမှ ရဲတပ်ဖွဲ့ဝင်များက သက်ဆိုင်ရာ မိသားစုများနှင့် နယ်ခြားစောင့်ရဲတပ်ဖွဲ့ ဌာနထံသို့ သတင်းပေးပို့ခဲ့ကြကြောင်း၊ ဇွန်လ ၁၁ ရက်နေ့ ညပိုင်းမှစတင်၍ အလယ်သံကျော်စခန်းမှ တပ်ဖွဲ့ဝင်များနှင့် အဆက်အသွယ် လုံး၀ ပြတ်တောက်သွားခဲ့ပြီး ဇွန်လ ၁၂ ရက်နေ့တွင်မူ မည်သည့် ဆက်သွယ်မှုမှ လုပ်ဆောင်မရတော့ကြောင်း ၊ ထို့ကြောင့် အလယ်သံကျော်နယ်ခြားစောင့်စခန်းတစ်ခုလုံး AA ၏ လက်အောက်သို့ ကျရောက်သွားပြီဟု ဆိုနိုင်ကြောင်း မြန်မာနိုင်ငံရဲတပ်ဖွဲ့ သတင်းရင်းမြစ်က ဆိုသည်။

ထို့ပြင်အဆက်သွယ်ပြတ်တောက်နေသော နယ်ခြားစောင့်ရဲတပ်ဖွဲ့ဝင်နှင့်မိသားစုဝင် ရာပေါင်းများစွာ ရှိသည့်အနက်မှ ၄၀၀ နီးပါးမှာ AA ၏ လက်အောက်တွင် စစ်သုံ့ပန်းများအဖြစ် ထိန်းသိမ်းခံထားရကြောင်း၊ စစ်သုံ့ပန်းဖြစ်နေသော နယ်ခြားစောင့်ရဲတပ်ဖွဲ့ဝင်တချို့က ကျန်ရစ်သော မိသားစုဝင်များကို AA ရဲဘော်များ၏ ခွင့်ပြုချက်ဖြင့် ဆက်သွယ်အကြောင်းကြားလာမှုများရှိနေကြောင်း သိရှိရသည်။

“နခခ ၆ ၊ နခခ ၉ ၊ နခခ ၇ စခန်း အပါအဝင် နခခ စခန်းတွေမှာရှိတဲ့ တပ်ဖွဲ့ဝင်တွေနဲ့ မိသားစုဝင်တွေ ၄၀၀ နီးပါးလောက် စစ်သုံ့ပန်းဖြစ်နေတာရှိပါတယ်။ တချို့ ပြန်လည်ပြီးတော့ ဆက်သွယ်လာတယ်။ ပြန်လည် ဆက်သွယ် သတင်းပို့တာရှိတယ်။ နောက်တစ်ခါ အဆက်အသွယ် ပြတ်တောက် ပျောက် ဆုံးစာရင်းအဖြစ် သက်ဆိုင်ရာရဲဌာနတွေဆီမှာ စာရင်းပေးထားတာလည်း ရာချီရှိတယ်။ ပျောက်ဆုံးနဲ့ အဆက်အသွယ်မရတဲ့ ရဲတပ်ဖွဲ့ဝင်အရေအတွက် ကိန်းဂဏန်းအတိအကျကတော့ လူကြီး တွေလောက်ပဲ သိမယ်” ဟု ရဲတပ်ဖွဲ့ သတင်းရင်းမြစ်က ဆိုသည်။

AA က မူ မောင်တောမြို့နယ်ရှိ စစ်ကောင်စီ၏ တပ်စခန်းများကို ဆက်လက်တိုက်ခိုက်သိမ်းပိုက်မည်ဖြစ်ပြီး နခခ ၄ ၊ မောရဝတီ ၊ “နားခေါင်းတိုစခန်း” များအပါအဝင် တပ်စခန်းများကို ဆက်လက် တိုက် ခိုက်သိမ်းပိုက်မည်ဖြစ်ပြီး စစ်ကောင်စီတပ်ဖွဲဝင်များအနေဖြင့် စောစီးစွာလက်နက်ချအညံ့ခံ ပါက အသက်အန္တရာယ်ကင်းဝေးမည်ဖြစ်ကြောင်း ဇွန်လ ၇ ရက်နေ့တွင် တရားဝင် သတင်းထုတ်ပြန်ခဲ့သည်။

ဓာတ်ပုံ- စစ်ကောင်စီလက်အောက်ရှိ နယ်ခြားစောင့်တပ်ဖွဲ့ဝင်များ။ (ပုံအဟောင်းဖြစ်ပါသည်။)

Photo- EPA။

Leave a Reply

Your email address will not be published. Required fields are marked *